УЛАДЗІСЛАЎ МАРОЗАЎ ПЕРАХОДЗІЦЬ У ПАРТУГАЛЬСКУЮ "АРОЎКУ"

Мінскі дынамавец Уладзіслаў МАРОЗАЎ афіцыйна стаў футбалістам "Ароўкі", якая зараз займае 9-е месца ў партугальскім элітным дывізіёне-2023/24.

Адзначым, што наш клуб з паразуменнем паставіўся да жадання Марозава, які меў кантракт яшчэ на два гады, паспрабаваць свае сілы за мяжом.

Этап кар’еры таленавітага выканаўцы ў шэрагах "бела-сініх"абмежаваўся адным сезонам — зато наколькі насычаным і паспяховым! Магутны форвард добра праявіў сябе напачатку мінулага года ў спарынгах і, на шчасце, здолеў перанесці зайздросную выніковасць у афіцыйныя паядынкі. І аказаўся вельмі яскравым персанажам айчыннай найвышэйшай лігі: найлепшы снайпер (16 трапных стрэлаў), найлепшы па сістэме "гол плюс пас" (16+4), найлепшы нападнік і гулец турніру.

Марозаў зрабіў вялікі ўнёсак у заваяванне чэмпіёнскага тытула, адкрыў лік сваім забітым мячам на еўракубкавай арэны (у выязной сустрэчы з баснійскім "Жалезнічарам") і замацаваўся ў асноўнай абойме нацыянальнай зборнай Беларусі (9/2).

Усяго 23-гадовы футбаліст правёў за "Дынама" 32 матчы (19+7).

Гэта трансферная навіна не можа не выклікаць лёгкага суму: як інакш, калі склад пакідае вельмі кваліфікаваны гулец? З іншага боку, варта парадавацца за футбаліста, які дзякуючы працавітасці і мэтанакіраванасці заслужыў магчымасць адправіцца ў лігу, якая стабільна ўваходзіць у топ-7 у Старым Свеце.

Улад, зычым усяго найлепшага ў новым клубе! Няхай цярпенне, прафесіяналізм, імкненне развівацца будуць максімальна ўзнагароджаны!