З ПУЦЁЎКАЙ У ЮНАЦКУЮ ЛІГУ УЕФА!

Каманда "бела-сініх" U18 завяршыла выступленні ў "турніры ліцанзавання". Прычым толькі ў выпадку перамогі ў заключным матчы гарантавала сабе фініш на верхняй прыступцы п’едыстала. На шчасце, нашы хлопцы дабіліся жаданага!

Група "А" (за 1-8-е месцы). Тур 8

26.5. РЦАР БДУ U18 (МІНСК) — ДЫНАМА-МІНСК U18 — 1:2
ДЫНАМА-МІНСК U18: Шымаковіч, Дубатоўка, Апяцёнак, Каняхін, Ісачэнка (Дубовік, 46), Адамовіч (Іванюковіч, 69), Грабцэвіч, Сакалоўскі (к), Аляксандраў (Арсеньеў, 56), Васкабойнікаў (Бекарэвіч, 69), Самуйлік (Ліцвін, 46).
ГАЛЫ: 0:1 — Самуйлік (34). 0:2 — Сакалоўскі (60). 1:2 — (70).

Паядынак, як і чакалася, атрымаўся вельмі напружаным і не самым відовішчным. Госці куды больш валодалі мячом і тэрыторыяй, але сапраўды небяспечных момантаў стварылі няшмат. Лік адкрылі па сканчэнні паўгадзіны гульні, калі Арцём Самуйлік трапна прабіў з цэнтра штрафной пляцоўкі.

Падвоіў перавагу Арцём Сакалоўскі — шыкоўным ударам са "стандарта" метраў з 22. У далейшым падначаленыя Дзмітрыя Лянцэвіча і Генадзя Лесуна паспяхова справіліся з захаваннем добрага для сябе выніку.

Бонусам да вікторыі аказалася пуцёўка ў Юнацкую лігу УЕФА-2024/25. Віншуем футбалістаў, трэнерска-адміністратыўны штаб, кіраўніцтва клуба і ўсіх заўзятараў з такім значным дасягненнем!