АНТОН ПУЦІЛА ЗАВЯРШЫЎ ГУЛЬНЯВУЮ КАР’ЕРУ

Дарагія сябры, паведамляць такія навіны заўсёды няпроста. Але ў кожнага, нават самага працяглага і паспяховага футбольнага шляха непазбежна ёсць фінальная кропка.

Менавіта такую гэтай зімой вырашыў у гульнявой кар’еры 36-гадовы Антон ПУЦІЛА, які вялікімі літарамі ўпісаў сябе ў біяграфію мінскага "Дынама".

Тут прыроджаны дрыблёр гучна заявіў пра сябе, паўдзельнічаў у заваяванні чэмпіёнскага тытула-2004, потым надоўга стаў адным з лідараў сярэдняй лініі каманды.

Адсюль у статусе зоркі нацыянальнага маштабу паехаў за мяжу, дзе выступаў за нямецкія "Гамбург" і "Фрайбург", расійскія "Волгу" з Ніжняга Ноўгарада і маскоўскае "Тарпеда", турэцкія "Газіантэпспор", "Анкарагуджу" і "Алтай".

Сюды вярнуўся ў 2021 годзе, але не ў ролі ганаровага ветэрана на няпыльную пенсію — як чалавек, здольны даваць вынік. І зноў аказаўся часткай абоймы, якія святкавала перамогу ў найвышэйшай лізе.

Такім чынам, Пуціла прыгожа закальцаваў гісторыю: у свае першы і апошні сезоны на прафесійным узроўні стаў у шэрагах роднага клуба наймацнейшым у краіне!

У мінулым — 171 афіцыйны матч, 25 галоў і 27 асістэнцкіх балаў за "бела-сініх". Наперадзе — праца ў структуры мінскага "Дынама" і мноства новых цікавых выклікаў.

Антон, вялікі дзякуй ад імя ўсіх заўзятараў беларускага футбола! Гэта насамрэч было выдатнае падарожжа!