СЁННЯ 70 ГАДОЎ З ДНЯ НАРАДЖЭННЯ ЮРЫЯ КУРНЕНІНА

14 чэрвеня 1954-га нарадзіўся Юрый КУРНЕНІН, які з’яўляўся адным з ключавых футбалістаў мінскага "Дынама" другой паловы 70-х — 80-х гадоў мінулага веку.

У складзе "бела-сініх" за амаль тузін сезонаў правёў 370 афіцыйных матчаў (33 галы), аказаўся непасрэдна датычным да ўсіх камандных дасягненняў.

Лідарскія якасці, нястомнасць, бясстрашнасць леваногага ўніверсала максімальна раскрыліся ў чэмпіянаце СССР-1982. У якасці прыкладу варта прыгадаць дамашні паядынак з "Кайратам" напрыканцы кастрычніка, калі Курненін аформіў хет-трык, прычым зафіксаваў канчатковыя лічбы на табло — 3:2 — на 89-й хвіліне. Атрыманы тым вечарам вялізарны зарад станоўчых эмоцый дапамог дынамаўцам ударна правесці заключны адрэзак турніру — і ўпершыню заваяваць ганаровы трафей.

У гісторыю нашага клуба ўвайшоў і як аўтар першага еўракубкавага гола — 14 верасня 1983-га на сваім полі ў супрацьстаянні 1/16 фінала Кубка чэмпіёнаў у вароты швейцарскага "Грасхопера" (1:0).

Падчас выступленняў за "бела-сініх" таксама станавіўся бронзавым прызёрам саюзнай найвышэйшай лігі (1983), уключаўся ў спіс "33 найлепшых футбалісты сезона ў СССР" (1982, 1983, 1984).

Па завяршэнні гульнявой кар’еры працаваў трэнерам, у тым ліку ўзначальваў родную каманду (красавік-1999 — чэрвень-2000).

Юрый Анатольевіч раптоўна памёр 30 ліпеня 2009-га. Але памяць аб сапраўднай легендзе жыве ў сэрцах яго родных, блізкіх, сяброў, калег і ўсіх прыхільнікаў айчыннага футбола…