ТРЭНЕРСКІ ШТАБ ВАДЗІМА СКРЫПЧАНКІ

Сфармаваны трэнерскі штаб галоўнай каманды "бела-сініх".

Асіставаць Вадзіму Віктаравічу Скрыпчанку будуць Ігар Анатольевіч Слесарчук, Дзяніс Аляксандравіч Зубкоўскі і Андрэй Мікалаевіч Дрозд, які сканцэнтруецца на працы з варатарамі. Апроч таго, у асноўным складзе застаюцца Дыяна Тропнікава і Аляксандр Быліна.

Ігар Слесарчук — выхаванец латвійскага футбола, на радзіме выступаў за "Сконта", "Венту", "Венцпілс", разам з "Талінам Садамам" станавіўся бронзавым прызёрам чэмпіяната Эстоніі, двойчы ўладальнікам Кубка і Суперкубка краіны. Гуляў за расійскія "Валгар-Газпром-2" і "Машук"-КМВ. У 1998-м падпісаў кантракт з мазырскай "Славіяй", якой дапамог заваяваць тытул чэмпіёна Беларусі і Кубак краіны. У 2002-м перайшоў у салігорскі "Шахцёр" — зноў узняў над галавой Кубак плюс прымерыў бронзу найвышэйшай лігі. Пазней абараняў колеры "Віцебска", магілёўскага "Дняпра", у 2014-м вярнуўся ў "Славію", дзе праз год завяршыў гульнявую кар'еру і заняў пасаду галоўнага трэнера дубля. З'яўляўся памочнікам Вадзіма Скрыпчанкі ў жодзінскім "Тарпеда"-БелАзе (2019) і "Мінску" (2021), узначальваў "Асіповічы" (2020).

Дзяніс Зубкоўскі цягам доўгага часу працаваў у структуры ФК "Мінск", у мінулым сезоне асіставаў Вадзіму Скрыпчанку ў галоўнай камандзе "гараджан".

Андрэй Дрозд на прафесійным узроўні дэбютаваў у сталічнай "Атацы-Аўры" (1995-97). У далейшым выступаў за салігорскі "Шахцёр", "Лунінец", жодзінскае "Тарпеда", "Белшыну", "Смаргонь". У 2011-21 гадах рыхтаваў варатароў у барысаўскім БАТЭ, дзе прайшоў шлях ад дзіцяча-юнацкай школы да галоўнай каманды. У 2022-м працаваў у юнацкіх зборных Беларусі.

Зычым новаму трэнерскаму штабу мінскага "Дынама" максімальных поспехаў у сезоне!