СКЛАД "БЕЛА-СІНІХ" ПАПОЎНІЎ ГЛЕБ ЖЭРДЗЕЎ

Кантракт з нашым клубам падпісаў хаўбек Глеб ЖЭРДЗЕЎ.

Навабранец "бела-сініх" нарадзіўся 18 мая 2000-га ў сталіцы Беларусі. Выхаванец ФК "Мінск" (першы трэнер Валерый Леанідавіч Андрыеўскі), за асноўны склад якога дэбютаваў 27 ліпеня 2018-га — у выязной кубкавай дуэлі 1/16 фінала з "Лідай".

У 2019-м нячаста выходзіў на газон за галоўную каманду (9 матчаў), таму перад стартам чэмпіянату-2020 адправіўся за гульнявой практыкай у "Нафтан" (Д2; 11 паядынкаў / 4 галы). Ужо летам вярнуўся ў склад "гараджан", але зноў не дачакаўся сапраўднай магчымасці праявіць сябе (3/1). Хоць менавіта на гэтым адрэзку дыстанцыі адкрыў лік забітым у найвышэйшай лізе мячам — 28 лістапада паразіў у Салігорску вароты "Шахцёра".

Наступная арэнда — у "Славіі" — аказалася больш паспяховай. У 2021-м Глеб запісаў на асабісты рахунак 24 сустрэчы і 5 трапных стрэлаў, прычым гол у кастрычніцкім дамашнім супрацьстаянні з БАТЭ быў прызнаны найлепшым у тым чэмпіянаце.

Сезон-2022 Жэрдзеў сустрэў паўнавартасным футбалістам мазыран — і падмацаваў сваю рэзка ўзрослую значнасць на полі статыстыкай: 31 матч і 20 балаў карыснасці (13 забітых мячоў + 7 выніковых перадач) ва ўсіх турнірах.

Мінулай зімой прыйшоў час пакаштаваць легіянерскага хлеба. Этап у ізраільскай "Бнэй-Егудзе" уключыў 13 паядынкаў і 2 галы.

Цяпер Глеб вырашыў прыехаць на радзіму і далучыцца да каманды, якая змагаецца за самыя высокія месцы. Вітаем у дынамаўскай сям’і і зычым максімальных поспехаў!