ВЕНІЯМІНУ АРЗАМАСЦАВУ - 85 ГАДОЎ

Cёння сваё 85-годдзе адзначае легенда нашага клуба - Веніямін Уладзіміравіч Арзамасцаў!

Веніямін Уладзіміравіч з'яўляецца адным з самых вядомых дынамаўцаў. Нарадзіўся ў 1937 годзе, ва ўзросце 25 гадоў са Смаленска трапіў у мінскае "Дынама". У складзе нашага клуба Веніямін Уладзіміравіч адгуляў 7 гадоў і за гэты час прыняў удзел у 228 матчах, забіў 12 галоў. У першым жа сваім сезоне згуляў ва ўсіх 38 гульнях, а каманда стала ўладальнікам бронзавых медаляў першынства СССР.

Пасля завяршэння футбольнай кар'еры Арзамасцаў адправіўся на трэнерскі масток. Першы час працаваў асістэнтам Эдуарда Малафеева і разам з камандай выйграў першынство Савецкага Саюза ў 1982 годзе. У наступным сезоне Эдуард Васільевіч адправіўся ў алімпійскую зборную, а Веніямін Уладзіміравіч стаў галоўным трэнерам бела-блакітных. Менавіта пад яго кіраўніцтвам каманда дэбютавала ў еўракубках і адразу дайшла да чвэрцьфіналу Кубка еўрапейскіх чэмпіёнаў, а праз год дынамаўцы зноў здолелі прабіцца ў чвэрцьфінал, але ўжо ў розыгрышы Кубка УЕФА. Таксама ў 1983 годзе мінскае "Дынама" заваявала бронзавыя медалі чэмпіянату СССР.

Сёння Веніямін Арзамасцаў па-ранейшаму працуе на карысць роднага клуба. Мы ад усёй душы віншуем легендарнага паўабаронцу з днём нараджэння, заслужанага трэнера бела-блакітных! Моцнага здароўя і доўгіх гадоў жыцця, Веніямін Уладзіміравіч! Дзякуй за вашу працу!