УЗГАДВАЕМ ЧЭМПІЯНАТ 1982 ГОДА

16 жніўня 1982 г. наша каманда сустракалася ў гасцях з "Чарнаморцам" з Адзесы. У першым крузе сустрэча завяршылася перамогай дынамаўцаў з лікам 2:1.

У гэты дзень на поле выйшлі: Вяргеенка, Шышкін (Зыгмантовіч, 46), Курненін, Янушэўскі, Трухан, Алейнікаў, Гоцманаў, Пудышаў, Кандрацьеў, Гурыновіч, Васілеўскі (Бялоў, 83). З прыкметных змен у складзе можна адзначыць, што ў лініі абароны не гуляў выкліканы ў зборную Бароўскі.

Гульня пачалася з невялікай разведкі. Але ўжо праз некалькі хвілін гаспадары поля завалодалі ініцыятывай. Аднак кожны раз мінчукі паспявалі адбіць атаку. Некалькі разоў небяспечна прарываўся да брамы Шарый. Але кожны раз быў спынены абаронцамі "Дынама". У адказ небяспечна прабілі па браме "Чарнаморца" Гоцманаў і Гурыновіч. Таксама ў пачатку тайма запомніўся магутны ўдар Курненіна, але мяч трапіў у ашэстак.

Усвядоміўшы, што павольная гульня да дабра не прывядзе, "Чарнаморац" узняў тэмп, смялей стаў біць па браме Вяргеенкі здалёк. На 38-й хвіліне Паконін нечакана перахапіў мяч, адпраўлены Пудышавым партнёру, і апынуўся адзін у штрафной плошчы мінчукоў. Гол здаваўся немінучым, але паўабаронца адзясітаў паслаў мяч побач са штангай.

Выправіўся Паконін праз чатыры хвіліны. "Чарнаморац" атрымаў права на штрафны метрах за 20 ад брамы "Дынама". Наша каманда ўзвяла масіўную сценку, але Паконін абышоў яе, даслаўшы хітрым кручаным ударам мяч пад ашэстак - 1:0.

Пасля перапынку дынамаўцы ўсёй камандай кінуліся каб адгуляцца. Але чамусьці абмяжоўваліся толькі накідамі ў штрафную суперніка. Наступы вязлі ў абароне "Чарнаморца", а контратакі адзясітаў былі вострыя і небяспечныя. Завалодаць ініцыятывай дынамаўцы здолелі толькі за чвэрць гадзіны да заканчэння сустрэчы. Былі і небяспечныя моманты, але Кандрацьеў з васьмі метраў прабіў міма брамы, а мяч пасля ўдару Зыгмантовіча трапіў проста ў рукі брамніку "Чарнаморца". І зваротным узяццем брамы ні адзін з нападаў не ўвянчалася.

Вынік сустрэчы 1:0, гэта параза "Дынама" дазволіла асноўным канкурэнтам нашай каманды - дынамаўцам Тбілісі і "Арарату" - скараціць разрыў з лідэрам.