УЗГАДВАЕМ ЧЭМПІЯНАТ 1982 ГОДА

7 жніўня 1982 г. мінскае "Дынама" прымала дома "Арарат" з Ерэвана. Праціўнік у турнірнай табліцы да гэтага моманту знаходзіўся адразу за дынамаўцамі, на другім радку.

"Дынама" згуляла такім жа складам, як і папярэдні матч: Вяргеенка, Бароўскі, Курненін, Зыгмантовіч (Шышкін, 46), Трухан, Пракапенка (Мельнікаў, 68), Гоцманаў, Пудышаў, Алейнікаў, Гурыновіч, Кандрацьеў.

Спачатку супернікі нібы прамацвалі адзін аднаго, вышукваючы слабасці ў абароне. А абарона ў ерэванцаў была шматлікая, у ёй і патаналі напады гаспадароў. Госці падоўгу разгульвалі мяч на сваёй палове поля, рэдка пераходзілі ў контратаку. Ужо на першых хвілінах тройчы мог вызначыцца Кандрацьеў. Але недакладнасць форварда і добрая гульня абаронцаў "Арарата" не дазволілі адкрыць лік. На 20-й хвіліне Кандрацьеў атрымаў мяч за некалькі метраў ад брамы ерэванцаў, але вырашыў яшчэ крыху яго падпрацаваць. Гэтага прамаруджвання аказалася дастаткова, і момант быў згублены. Да канца тайма "Дынама" злавіла сваю гульню, і паказала атакуючы, хуткасны футбол. Нажаль, ні адзін з нападаў не прывёў да змены ліка. Побач са штангай праляцеў мяч пасля ўдару Зыгмантовіча, потым такая ж сітуацыя здарылася пасля ўдару Курненіна, Гоцманаву не хапіла імгнення для вырашальнага ўдару. На перапынак каманды пайшлі з нулямі на табло.

Праз пяць хвілін пасля перапынку вызначыцца мог ужо лідэр ерэванскай каманды - Аганесян. З блізкай адлегласці ён небяспечна прабіў галавой, гаспадароў поля выратаваў Вяргеенка, які здолеў перахапіць мяч у ніжнім куце. Канчаткова абудзіліся дынамаўцы прыкладна з 60-й хвіліны. Гульня ажывілася пасля зробленых замен. Замест Зыгмантовіча на полі выйшаў Шышкін, які заняў месца правага абаронцы, а Гоцманаў высунуўся наперад. Яшчэ праз нейкі час Мельнікаў змяніў Пракапенку. Высунуты наперад Гоцманаў дадаў у нападзе вастрыні. Толькі цуд выратаваў гасцей, калі мяч пасля ўдару Алейнікава адбіла штанга.

І вось нарэшце град нападаў дынамаўцаў увянчаўся поспехам. На 74-й хвіліне доўгую перадачу прыняў Кандрацьеў, галавой скінуў мяч Гурыновічу, і той дакладна прабіў у ніжні кут. Аднак усяго праз 3 хвіліны госці адказалі. Аганесян спрытным фінтам здолеў абгуляць двух абаронцаў (Трухана і Бароўскага) каля самай лініі брамы і даў дакладны пас пад удар Роберту Галусцяну, які набягаў.

Апошнія хвіліны мінчукі кінуліся атакаваць, але паспешнасць відавочна шкодзіла дакладнасці. Вынік сустрэчы 1:1, як і ў першым крузе..

Фота: www.fc-dynamo.ru