УЗГАДВАЕМ ЧЭМПІЯНАТ 1982 ГОДА

Пакуль у Чэмпіянаце Беларусі 2022 г. міжнародная паўза, прапануем узгадаць, як у гэты час гуляла "Дынама" 1982 г.

11 верасня ў Мінску наша каманда прымала маскоўскае "Тарпеда". Пасля перамогі над гэтым супернікам у першым крузе мінчукі ўзначалілі турнірную табліцу чэмпіянату краіны.

Супраць "Тарпеда" 11 верасня дынамаўцы згулялі наступным складам: Вяргеенка, Бароўскі, Зыгмантовіч, Янушэўскі, Трухан, Пракапенка (Мельнікаў, 69), Гоцманаў, Пудышаў, Алейнікаў, Гурыновіч, Кандрацьеў (Васілеўскі, 57). Нагадаем, Курненін быў дыскваліфікаваны.

Першыя пятнаццаць-дваццаць хвілін гульня праходзіла спакойна, у сярэднім тэмпе. Каманды прыглядаліся адна да адной. Затым Алейнікаву атрымаўся ўдар па раме, які нібыта паслужыў сігналам да серыі нападаў гаспадароў поля. Далей асабліва грознай была атака, распачатая Пудышавым са штрафнога на 21-ай хвіліне. Яго навясную перадачу галавой прыняў Гурыновіч, але паслаў мяч у штангу. Зыгмантовіч паспеў да мяча раней за брамніка, але прабіў з трох метраў міма брамы. У іншых выпадках, калі ў мінчукоў атрымоўваліся ўдары, бездакорна гуляў брамнік "Тарпеда".

Лік быў адкрыты на 65-ай хвіліне пасля таго, як цэнтральны абаронца масквічоў Жупікаў здзейсніў смелы рэйд ад сваёй штрафной плошчы да чужой і прабіў па браме здалёк. Вяргеенка быў відавочна не гатовы да такога павароту падзей і прапусціў не вельмі цяжкі мяч.

За астатні час так і не ўдалося змяніць лік на табло. Вынік сустрэчы 0:1, і гэта першая параза дынамаўцаў на сваім полі ў гэтым сезоне. Больш за тое, пасля гэтай сустрэчы "Дынама" перамясцілася з першага на другі радок турнірнай табліцы. Лідэрства зараз перайшло да нашых аднаклубнікаў з Тбілісі. Пры аднолькавай колькасці балаў, яны мелі найлепшыя вынікі ў матчах з мінчукамі.

Журналісты пасля сустрэчы пісалі, што гэта параза і папярэдняя нічыя - гэта цяжар лідэрства, які дае аб сабе ведаць і, відаць, пачала адчувацца псіхалагічная стомленасць калектыву. Аднак, час на выпраўленне становішча яшчэ заставаўся.

Наступны матч дынамаўцы правялі 19 верасня ў Краснадары супраць мясцовай "Кубані".

Фота: fc-dynamo.ru