АНДРЭЙ РЫЛАЧ І АРЦЁМ МАКАЎЧЫК - ГУЛЬЦЫ МІНСКАГА "ДЫНАМА"

Мы рады паведаміць, што трохгадовыя кантракты з мінскім "Дынама" падпісалі два беларускія футбалісты: галкіпер Арцём Макаўчык і паўабаронца Андрэй Рылач.

Арцём нарадзіўся 4 ліпеня 2000 года ў Мінску, Андрэй - 5 чэрвеня 2002 года (таксама ў Мінску). Макаўчык правёў некалькі гадоў у акадэміі мінскага "Дынама" і ў Акадэміі АБФФ. У 2017 годзе далучыўся да мінскага "Тарпеда", а летам сезону-2019 стаў галкіперам "Энергетыка-БДУ". У Вышэйшай Лізе дэбютаваў у жніўні 2020 года.

Рылач пачынаў свой футбольны шлях у акадэміях "Мінска" і мінскага "Дынама". Таксама некаторы час правёў у школах БАТЭ, ФШМ і салігорскага "Шахцёра". У 2019 годзе трапіў у склад дзяржынскага "Арсенала", а летам таго ж года падпісаў кантракт з "Энергетыкам-БДУ". За асноўны склад "студэнтаў" дэбютаваў у кастрычніку 2020 года. 

Абодва гульцы таксама неаднаразова выклікаліся ў юнацкія і маладзёжную зборныя Беларусь, Андрэй з'яўляецца капітанам цяперашняй "маладзёжкі". За плячыма Арцёма Макавічка 49 матчаў за "Энергетык-БДУ", 14 з якіх - "на нуль" (прапушчаных галоў - 54). Андрэй Рылач адгуляў у 64 сустрэчах, адзначыўся 2 галамі і 3 выніковымі перадачамі. Абодва футбалісты па выніках сезону 2022 заваявалі срэбраныя медалі чэмпіянату Беларусі.

Футбольны клуб "Дынама-Мінск" вітае Арцёма і Андрэя ў сваіх шэрагах і жадае ім паспяховай кар'еры ў складзе дынамаўцаў!