ЮРЫ МАЛЕЕЎ. ПАСЛЯМАТЧАВЫ КАМЕНТАР.

Юры Іванавіч, віншуем вас з перамогай і заваяваннем другога Суперкубка ў гісторыі каманды. Давайце традыцыйна пачнем з вашых першых уражанняў ад гульні.

- Вялікі дзякуй. У першую чаргу вядома скажу, што задаволены перамогай. Калі казаць пра саму гульню, то тут важна ўлічваць, што да Суперкубка мы падыходзілі пасля крыху скамечанай перадсезонкі. Літаральна некалькі дзён таму нарэшце ўдалося сабраць усю каманду. Толькі два таварыскія матчы згулялі дзяўчаты зімой і гэтага, безумоўна, недастаткова. Трэніроўкі трэніроўкамі, але калі няма гульнявога тонусу, знікаюць і каманднае ўзаемадзеянне, і фізічныя паказчыкі. Трэніравацца можна доўга, аднак калі ты не вытрымліваеш гульні 90 хвілін - будзе вельмі няпроста. Але, паўтаруся, вынікам я задаволены.

Літаральна нядаўна вярнуліся легіянеры нашай каманды, футбалісткам спатрэбілася шмат часу, каб прыбыць у размяшчэнне "Дынама-БДУФК". Як адчуваюць сябе дзяўчаты на дадзены момант і ў якім гульнявым стане знаходзяцца?

- Чатыры дні таму яны вярнуліся, можна сказаць так. Плюс трэба ўлічваць, што легіянерам заўсёды неабходны яшчэ 1-2 дні адпачынку пасля пералётаў. У прынцыпе я ўсімі задаволены, не магу нічога сказаць. Неабходна проста памятаць, што каманда - адзінае цэлае, і калі нехта выпадае, гэта адразу кідаецца ў вочы. Аднак яшчэ раз скажу, што пытанняў да футбалістак у мяне няма.

Даволі доўга ў гэтым матчы каманда гуляла без замен, толькі напрыканцы другога тайма на полі з'явіліся Крысціна Ціхаводава і Дар'я Сцяжко. Гэта звязана з тым, што не было неабходнасці ў заменах ці ўсё ж не хацелася рызыкаваць?

- Ведаеце, і тое, і другое. Калі б мы згулялі большую колькасць гульняў у міжсезонне, мяркую, я б падпускаў дзяўчат, і яны б згулялі. Але, як вы памятаеце, толькі дзве гульні было праведзена за люты тым складам, які ў нас быў. Ёсць страх і зламаць дзяўчат, не буду хаваць. Ізноў жа, да прыкладу, Кацярына Дудко, гулец досыць дасведчаны, і тое гублялася ў пачатку гульні, а маладзейшым дзяўчатам магчыма было б яшчэ цяжэй. Таму тут недзе 50 на 50.

Як ацаніце гульню нашага суперніка, ЖФК "Мінск"? Праз два тыдні нас ізноў чакае #GirlsDerby, толькі зараз ужо ў рамках Жаночай Лігі-2022...

- У цэлым, каманда ўзмацнілася, нашы дзяўчаты папоўнілі іх склад. "Мінск" адчуў упэўненасць, яны правялі матчы супраць маскоўскага "Лакаматыва" і мелі ў гульнявым плане перавагу перад намі. Але не магу сказаць, што ўбачыў нешта звышнатуральнае.

Калі не сакрэт, ці адчуваеце, што гэта ўжо шосты трафей, які каманда заваявала пад вашым кіраўніцтвам?

- Праўду кажучы, я іх не лічу. Як трэнеру мне важны працэс, пастаноўка гульні, прагрэс гульцоў і, адпаведна, прагрэс усёй каманды. Гэта самае галоўнае. Хоць трафеяў ніколі не бывае замнога (усміхаецца).