УЗГАДВАЕМ ЧЭМПІЯНАТ 1982 ГОДА

12 ліпеня 1982 г. завяршылася міжнародная паўза, выкліканая ўдзелам зборнай СССР у Чэмпіянаце свету. З дынамаўцаў Мінска ў ім прыняў удзел Сяргей Бароўскі, а зборная скончыла свой выступ у другім раундзе турніру.

14 ліпеня мінчукі прымалі на сваёй хатняй арэне "Тарпеда" з Кутаісі.

У сустрэчы ўдзельнічалі наступныя дынамаўцы: Вяргеенка, Бароўскі, Курненін, Трухан, Зыгмантовіч, Пракапенка, Гоцманаў (Алейнікаў, 76), Пудышаў, Мельнікаў, Кандрацьеў, Васілеўскі (Гурыновіч, 35). Гэты склад супадаў з тым, што быў у каманды ў самым пачатку чэмпіянату, і прывёў да перамог над маскоўскімі "Дынама" і "Спартаком". Аднак змянілася схема: замест пяці абаронцаў, на полі іх было чатыры: Гоцманаў, Курненін, Бароўскі, Трухан, а Пудышаў сышоў у паўабарону.

У гасцей было ўсяго дзве магчымасці ўзяць браму, і яны імі скарысталіся. І мінчукам два разы падчас гульні даводзілася даганяць.

На 8-ай хвіліне тарпедаўцы скарысталіся стратай мяча супернікам і даслалі першы, здавалася, нечаканы для дынамаўскіх абаронцаў мяч з-за межаў штрафной у нашу браму. Праз 6 хвілін Пракапенка ў штрафной плошчы прыняў мяч ад Пудышава і адразу ўразіў браму тарпедаўцаў і аднавіў раўнавагу.

Ціск мінчукоў нарастаў. Да гэтага моманту рэальныя магчымасці забіць не скарысталі Пудышаў, Пракапенка, Кандрацьеў. Уся ўвага дынамаўцаў была накіравана на атаку. З-за гэтага яны са спазненнем вярталіся да сваёй брамы не заўсёды надзейна падстрахоўваючы адзін аднаго. Гэтым і карысталіся госці. Яны зноў атакавалі і на 28-ы найлепшы бамбардзір чэмпіянату - Мегрэладзэ галавой адправіў мяч у браму Вяргеенкі.

У канцы першага тайма Васілеўскага на полі замяніў Гурыновіч. І адразу пасля перапынку даказаў, што замена была дакладная, і ён можа з'явіцца ў патрэбны час у патрэбным месцы. Адбіваючы чарговую хвалю атак, абаронца гасцей вырашыў адбіць мяч далей ад сваей брамы. Але трапіў у Гурыновіча, які стаяў побач з ім. Мяч адрыкашэціў наўпрост у браму гасцей.

Здавалася, сустрэча завершыцца нічыёй. Тарпедаўцы абараняліся і цягнулі час, а гэта іх брамнік нават атрымаў папярэджанне. Але мінчукі змагаліся да канца. За некалькі секунд да фінальнага свістка Курненін зрабіў выдатную перадачу ў штрафную, Кандрацьеў высока скокнуў і прыняў яе, а затым галавой адправіў мяч у "дзявятку".

Вынік сустрэчы 3:2 і мінскае "Дынама" ўмацоўвае свае пазыцыі ў лідзіруючай групе чэмпіянату.

А ўжо 17 ліпеня "Дынама" рыхтавалася прымаць дома "Нефтчы" з Баку. Гэты матч вымушаны быў прапусціць Курненін з-за перабору жоўтых картак.

Фота: www.fc-dynamo.ru