УЗГАДВАЕМ ЧЭМПІЯНАТ 1982 ГОДА

Ужо заўтра наша каманда сустрэнецца з магілёўскім "Дняпром". А 40 гадоў таму "Дынама" 22 красавіка прымала ў Мінску "Чарнаморец" з Адэсы, які да таго моманту знаходзіўся на апошнім радку турнірнай табліцы. Двухтыднёвы перапынак паміж папярэднім матчам і матчам з "Чарнаморцам" быў абумоўлены падрыхтоўкай зборнай СССР да чэмпіянату свету ў Гішпаніі.

Эдуард Малафееў вызначыў наступны склад гульцоў: Курбыка, Трухан, Курненін, Янушэўскі, Шышкін (Зыгмантовіч, 40), Пракапенка, Гоцманаў, Алейнікаў, Мельнікаў, Кандрацьеў, Васілеўскі (Гурыновіч, 53).

Склад ужо больш прыкметна адрозніваўся ад складаў на папярэднія гульні. І многія спартыўныя журналісты загаварылі аб незгулянасці каманды ў гэтым складзе. Дапускалі яны таксама і тое, што з-за нізкай турнірнай пазіцыі суперніка, "Дынама" расслабілася. У любым выпадку гульня ў мінчукоў у першым тайме не задалася: яе называлі невыразнай, пісалі, што каманда не магла набраць хуткасць, пачыналася мітусня, узнікалі памылкі пры перадачы мяча. Усё гэта вылілася ў прапушчаны на 36-ай хвіліне мяч у браму дынамаўцаў. Гэта быў першы гол, забіты "Чарнаморцам" у чэмпіянаце таго года.

Тут жа Малафееў зрабіў замену - замест Шышкіна на поле выйшаў Зыгмантовіч, таксама трэнер перабудаваў абарончыя парадкі: на месца правага абаронцы перайшоў Гоцманаў. Аднак змяніць лік да перапынку не ўдалося.

І ў другім тайме гульня складана ішла ў "Дынама". На 53-й хвіліне Васілеўскага замяніў Гурыновіч, які толькі гэтай раніцай вярнуўся ў Мінск пасля гульні ў складзе зборнай СССР.

І вось у апошнія 15 хвілін разгарнулася сапраўдная барацьба, якую так чакалі заўзятары на трыбунах. На 75-ай хвіліне дакладным пасам Гурыновіча скарыстаўся Пракапенка. А на 84-й сам Гурыновіч ударам галавой завяршыў штрафны Курненіна. Вынік сустрэчы: 2:1, была здабытая самая сапраўдная валявая перамога, хоць каманду і крытыкавалі за фору, якую спачатку атрымаў, як здавалася, не небяспечны супернік.

І ўжо 26 красавіка "Дынама" чакала ў Мінску "Зеніт". А пакуль турнірная табліца выглядала так: 

Фота: www.fc-dynamo.ru