ЗОРНЫ МЯЧ-2022: ВЫНІКІ СЕЗОНУ

Cёння адбылося афіцыйнае падвядзенне вынікаў усяго футбольнага сезону ў Беларусі. У сталічнай "Astoria Riverside" па выніках двухгадзіннага мерапрыемства былі аб'яўлены пераможцы ў індывідуальных, а таксама ў камандных намінацыях.

У жаночым футболе зноў галоўнымі хэдлайнерамі сталі футбалісткі мінскага "Дынама". Прадстаўнікі "Дынама-БДУФК" здолелі забраць 4 з 7 намінацый: найлепшай брамніцай чэмпіянату Беларусі была прызнана Кацярына Уласевіч, найлепшай нападаючай стала Вікторыя Валюк. Трэнерам года стаў Юрый Іванавіч Малееў, які прывёў сваіх падапечных да перамог у чэмпіянаце, Кубку і Суперкубку краіны. Ну а гульцом года ў чэмпіянаце Беларусі стала наша Ганна Піліпенка.

Наш клуб стаў уладальнікам і некалькіх камандных намінацый. Так, у скарбонку бела-блакітных пайшоў прыз "Справядлівай гульні". Яшчэ адзін прыз, які дастаўся мінскаму "Дынама" - намінацыя "За волю да перамогі", уручаная акрамя бела-блакітных яшчэ двум камандам - "Энергетыку-БДУ" і салігорскаму "Шахцёру". 

Таксама былі абвешчаны сімвалічныя зборныя чэмпіянатаў. У каманду "А" трапіў дынамаўскі паўабаронца Дзяніс Грачыха. Абаронца Максім Швяцоў, паўабаронца Арцём Канцавы і нападаючы Іван Бахар аказаліся ў складзе каманды Б. 

Падзякамі за развіццё дзіцячага футбола былі адзначаны двое трэнераў Акадэміі мінскага "Дынама": узнагароды атрымалі трэнер каманды #Дынама2011 Сяргей Гігевіч, а таксама трэнер каманды #Дынама2013 Іван Гарбар. Віншуем спецыялістаў з заслужанымі ўзнагародамі. 

Мы дзякуем усім, хто правёў з намі сезон-2022 і падтрымліваў нас, нягледзячы ні на што. Наперадзе каманды чакае міжсезонне, а нашых заўзятараў мноства займальных навін, якімі мы парадуем ужо ў найбліжэйшы час.