ДЫНАМАЎЦЫ Ў БРЭСЦКАЙ КРЭПАСЦІ

Сёння, перад гульнёй з берасцейкім "Дынама", якая адбудзецца ў 18:00 на ОСК "Брэсцкі" футбалісты і трэнерскі штаб асноўнай каманды "Дынама-Мінск" наведалі мемарыяльны комплекс "Брэсцкая крэпасць-герой". Прадстаўнікі клуба ўсклалі кветкі да галоўнага манумента, а таксама наведалі некалькі экспазіцый комплексу.

Брэсцкая крэпасць - унікальны помнік беларускай гісторыі і Вялікай Айчыннай Вайны, сымбаль гераічнага супраціву і выбітнай мужнасці яе абаронцаў. У гэты час беларусы прыгадваюць важныя даты сваёй гісторыі: пачатак вайны (22 чэрвеня 1941 года), а таксама Дзень Незалежнасці Рэспублікі Беларусь (3 ліпеня). Футбольны клуб "Дынама-Мінск" таксама ўдзяляе асаблівую ўвагу гістарычнай памяці нашай краіны, шануе і памятае традыцыі беларускага народа. Візіт у "Брэсцкую крэпасць" - адна з ініцыятыўных акцый клуба па наведванні важных гістарычных помнікаў Беларусі. 

Гульцы клуба наведалі галоўны манумент крэпасці, музей абароны, "5 форт", а таксама пабывалі на невялікай лекцыі аб гісторыі крэпасці. Сваімі ўражаннямі аб эскурсіі падзяліўся абаронца асноўнай каманды Максім Швяцоў. 

- Гэтае асаблівае месца і для горада, і для ўсёй краіны. Складана словамі перадаць усю значнасць подзвігу, які быў тут здзейснены і заслугі тых, чыю памяць прыйшлі сёння ўшанаваць. Рады, што знайшлі час перад матчам, каб наведаць "Брэсцкую крэпасць" і даведацца нешта новае пра яе гісторыю. 

Адзначым, што ў гэтым сезоне таксама гістарычныя месцы краіны наведваюць каманды дынамаўскай Акадэміі, гульцы жаночай каманды і дублюючага складу мінскага "Дынама" і прадстаўнікі кіраўніцтва футбольнага клуба.