НАШЫ Ў ЗБОРНЫХ

У перыяд з 10 па 18 верасня Нацыянальная жаночая зборная Беларусі па футболе правядзе вучэбна-трэніровачны збор, а таксама згуляе адборачны матч ЧС-2023 супраць каманды Кіпра. Гульня пройдзе 17 верасня ў Мінску.

Для ўдзелу ў вучэбна-трэніровачным зборы галоўны трэнер зборнай Юры Іванавіч Малееў (таксама галоўны трэнер каманды «Дынама-БДУФК») выклікаў 11 футбалістак мінскага «Дынама».

У склад зборнай каманды атрымалі выклік: абаронцы Настасся Новікава, Вікторыя Казакевіч і Настасся Папова; паўабаронцы Настасся Ліннік, Віта Мікалаенка, Настасся Шлапакова, Ганна Піліпенка, Вікторыя Валюк і Таццяна Маркушэўская; нападаючыя Карына Альховік і Дар'я Сцяжко. Акрамя таго, у працы з Нацыянальнай зборнай будуць задзейнічаны трэнеры нашай жаночай каманды - Руслан Камейша, Аляксандр Скакалін і доктар Вольга Уласава.

Таксама выклік у Нацыянальныя зборныя сваіх краін атрымалі шэраг футбалістак нашай жаночай каманды. Галкіпер Наталля Мунцяну адправіцца ў каманду Малдовы з 13 па 22 верасня для ўдзелу ў адборачных гульнях супраць зборных Італіі і Швейцарыі (даты матчаў - 17 і 21 верасня адпаведна).

У зборную Камеруна выкліканыя футбалісткі Вуланія Дабда Клаўдзія і Ндзана Фег Калет: дзяўчатам трэба будзе згуляць на «Aisha Buhari Invitational tournament» (футбольны турнір, арганізаваны федэрацыяй футбола Нігерыі для жаночых нацыянальных зборных Ганы, ПАР, Камеруна, Малі, Марока і Нігерыі). На гэтым жа турніры, але ў складзе Нацыянальнай каманды ПАР згуляе Лебаганг Рамалепе Эстэр. Матчы пройдуць у перыяд з 13 па 21 верасня.

Жадаем нашым гульцам поспеху і перамог!