ШЭРАГ ФУТБАЛІСТАЎ ПАКІДАЕ МІНСКАЕ "ДЫНАМА"

Пасля заканчэння тэрміну дзеяння працоўных дагавораў каманду пакідаюць Аляксандр Сялява, Максім Плотнікаў, Аляксандр Чыж, Канстанцін Кучынскі і Аляксей Рыас. Таксама пасля завяршэння тэрміну дзеяння арэнднай дамовы «Дынама» пакінуў Дамінік Дзінга, футбаліст вяртаецца ў свой клуб.

Галкіпер Максім Плотнікаў і абаронца Аляксандр Чыж з'яўляюцца выхаванцамі мінскага «Дынама». За асноўны склад клуба Плотнікаў правёў 44 гульні, у якіх прапусціў 41 гол, а 18 сустрэч згуляў "на нуль". Аляксандр Чыж прыняў удзел у 21-м матчы і вызначыўся 2-ма забітымі галамі.

Канстанцін Кучынскі перайшоў у «Дынама-Мінск» у 2017 годзе, выступаў за дублюючы склад. На правах арэнды выступаў у складзе «Ліды» і «Белшыны», у сезоне-2021 прыняў удзел у двух матчах Вышэйшай Лігі, за дублюючы склад клуба - 12 матчаў (2+2).

Аляксей Рыас стаў гульцом клуба ў студзені 2020 года. У мінулым сезоне адгуляў 28 матчаў, забіў 2 галы і аддаў 2 выніковыя перадачы. У сезоне-2021 выступаў пераважна за дублюючы склад мінскага «Дынама»: 16 матчаў, у якіх вызначыўся забітым голам. Таксама згуляў у 2-ух матчах Вышэйшай Лігі.

Паўабаронца Аляксандр Сялява ў сезоне-2021 прыняў удзел у 28 матчах і аддаў 2 галявыя перадачы. Дамінік Дзінга за 2 гады ў складзе бела-блакітных адгуляў у 43-х матчах, забіў гол і аддаў 2 галявы перадачы.

Футбольны клуб «Дынама-Мінск» дзякуе футбалістам за супрацоўніцтва і жадае ім удачы ў далейшай кар'еры.