#Дынама2011 і #Дынама2014 - сярэбраныя прызёры турніру "Наша будучыня-2021"

На мінулым тыдні ў Мінску завяршыўся чарговы турнір «Наша будучыня» сярод каманд 2011 і 2014 гадоў нараджэння. Некалькі слоў аб выніках выступлення нашых хлопцаў.

Каманда 2011 года нараджэння стала сярэбраным прызёрам турніру ў сваёй узроставай катэгорыі. Вельмі ўпэўнена ішлі падапечныя Сяргея Маслоўскага, не саступіўшы ў ніводным паядынку за ўсе гульнявыя дні. У паўфінале хлопцы перамаглі другую каманду мінскага «Дынама» з лікам 9:0, але перагуляць у фінале «Вяціч» бела-блакітныя не здолелі: матч завяршыўся з лікам 0:4 на карысць супернікаў, а нашы футбалісты занялі другое месца на турніры.

Другая каманда 2011 года нараджэння заняла чацвёртае месца. Дынамаўцы перамаглі «Змену», БАТЭ, «Шахцёр», «Мінск-11» і потым саступілі ў заключным матчы «Мінску» .

Індывідуальныя ўзнагароды:

Найлепшы брамнік - Фёдар Жук

Найлепшы бамбардзір - Максім Саўчыц

Хлопцы з каманды 2014 года нараджэння таксама сталі сярэбранымі прызёрамі турніру «Наша будучыня-2021». На групавым этапе ў падначаленых Дзмітрыя Коўба 3 перамогі, адна нічыя і адна параза. У заключным матчы юныя футбалісты мінімальна саступілі аднагодкам з «Мінска» і такім чынам заваявалі сярэбраныя медалі турніру.

Індывідуальную ўзнагароду атрымаў Яўген Жышкевіч як найлепшы бамбардзір.

Спяшаемся павіншаваць нашых хлопцаў і трэнераў з чарговымі медалямі турніру. Жадаем далейшых поспехаў і новых перамог у футбольным сезоне. 

Фота: footbik.by